Luk 13 | KYG | STEP | Ani afina'mo mago vaya'mo Yesutegamo e'a, Galeliya kotega vaya'mogi sipisipi ofalinimo ne'amige'apae'mo Pailati ati vaya'amogi e'a hapae'nageno sipisipimo kola'e vaya'mogi kola'e'mo magokepi aino lakino hane'niye, hu'a ha pai'nageno'ae'mo

Luke 13

Lapaipamo alitapa afe olesaya vaya'mo faligae, huno hu'niya gemae

1 Ani afina'mo mago vaya'mo Yesutegamo e'a, Galeliya kotega vaya'mogi sipisipi ofalinimo ne'amige'apae'mo Pailati ati vaya'amogi e'a hapae'nageno sipisipimo kola'e vaya'mogi kola'e'mo magokepi aino lakino hane'niye, hu'a ha pai'nageno'ae'mo 2 Yesu'a, ani kava hute'a fali'naya'mofe'mo hosu kava'apimo'a muki Galeliya kotega vaya'ai hosu kava'apimo ago aeno aga se'niye, hutapa lapakesa ne'afifiye. 3 Ha'ao, lapaipamo alitapa afe olesayana ani kava hutapa faligae. 4 Silomi kotegamo lusi yatala yafa no'mo aino halagape vaino asagauno aino eitini'a vaya'mo apamagi'nige'a fali'naya vaya'ai hosu kava'apimo'a muki Yulusalemu taonifi'mo mai'naya vaya'ai hosu kava'apimo ago aeno aga se'niye, hutapa lapakesa ne'afifiye. 5 Ha'ao, lapaipamo alitapa afe olesayana ani kava hutapa faligae, huno hapa pai'niye.

Alagamo no'aeya yosae'mo hu'niya gemae

6 Inagi mago gemo aeno kalafefa gemo huno hapa paino'ae'mo, mago vekamo'a hoya'afi'mo fiki yosamo hane'nigeno yosa alagamo ae'nisiya'ae'mo agesiyafe'mo e'niyana o'ae'niye. 7 Agaemo yosa hoya'afi'mo ali'ya'mo ne'aliya vekae'mo, lole'e mago'e kafugamo e'na agege agege hu'novana alagamo o'ae'nige'na age'nove. Lanitani mopamo ago leno hau hu'nigeno'ae'mo no'aeyanagi he'ya aika atalo, huno ha pai'nigeno'ae'mo, 8 ali'ya aepa vekae, hemeni kafugamo afa'a ato. Mago mopamo ai'yu aite'na malasinimo malegauve. 9 Anaga kafugamo alagamo aesiya'mo'mo kanalene. Alagamo o'aesigekae'mo eka he'ya aika atalegane, huno ha pai'niye, huno hapa pai'niye.

Yesu'a akame'yamo aeno fagagi'niya a kanomo alino api aino ate'niya gemae

10 Mago Sapati afina'mo Yesu'a Yu vaya'ai mono nopi'mo haino alino apaya ne'malegeno'ae'mo 11 Mago a kanomo eitini'a kafugamo akame'ya ayamufamo aeno fagagi'nigeno ape hulitata huno mai'niye. 12 Mono nopi'mo mai'nigeno Yesu'a ageteno'ae'mo, Ane, kakame'yamo aeno fagagi'niya nofikamo hatu mae'na kate'nove, huno ha paiteno 13 agufale'mo aya'mo male'nigeno malage huno akame'yamo aino api ai'nigeno he tino'ae'mo Goti agi'ale'mo alino asaga huno ate'niye. 14 Ate'niya'monanafa Yesu'a Sapati afina'mo alino api aino ate'niya kavafe'mo monote'mo ne'yagaiya vekamo'a aipamo le'nigeno muki vaya'aife'mo, sigisi'a afina'mo ali'ya'mo alisaya afina'mo hane'niya'mofe'mo alino alagepa huno lapatesiyafe'mo sapati afina'mo o'metapa alu afinake'mo eyo, huno hapa pai'nigeno 15 Ala kava ne'mo'a ge'ale'mo aeno atagaina huno hapa paino'ae'mo, aetapa ati nekaya vayanagi Sapati afina'ae afina'ae'mo pulumakatapimofi hositapimofi hutapa no'apifati'mo hatu maeta apatetetapa ani'mo nesayafe'mo apavalelitapa ne'vae. 16 Hatu maeta ne'apataya'mofe'mo ani a kanomo Emalehamu aginago a kanomo eitini'a kafugamo lusi yatala afina'mo Satani'a nofi aeno ate'nigeno mai'niya a kanomo hatu mae'na atesuva kava'mo ohane'nifiye, huno hapa pai'nige'apae'mo 17 kame vaya'amogi afite'a apavagage hu'niya'monanafa muki vaya'mogi no'agaya agufa alagepa kava'mo hu'nige'a agete'apae'mo apamogaga ai'nae.

Masateti avina ya'e yisi'efe'mo aeno kalafefa gemo hu'niya gemae

(Mt 13:31-32; Mk 4:30-32)

18 Agaemo, Goti'a yagaino ne'apateya kava'mo haiya agufa kavakana huno hane'niye. Goti'a yagaino ne'apateya kavafe'mo haiya agufa gemo hu'na ae'na kalafefa gemo huguve. 19 Ina kavakana huno hane'niyana mago vekamo'a masateti avina ya'mo aise avina ya'atomogeno hoyamo aliteno hakale male'nigeno hageno haino mago yosagana huno hane'nigeno nama anaga'mo haleli'e'a akopale'mo hakalete'a apano'mo ki male'nae, huno hapa paiteno'ae'mo, 20 Goti'a yagaino ne'apateya kava'mo haiya agufa kavakana huno hane'niye. 21 Ina kavakana huno hane'niyana mago a kanomo'a falaovafi'mo ali'a atagu fae male'nageno ko nesiya ya'mo agi'amo yisimo alino talamufi'mo hane'niya falaovafi'mo atagu fae male'nigeno aino atagu faeno uneno huno muki falaovafi'mo ali'ya'mo ali'nigeno kosi'niye, huno hapa pai'niye.

Aise kipapi'mo haitapa falesayafe'mo lapaya mukiki hiyo, huno hu'niya gemae

(Mt 7:13-14,21-23)

22 Yesu'a muki aise taonifi'e alopa taonifi'e'mo umenitata huno alino apaya malemale malemale hume hume uno Yulusalemu taonifi'mo u'niye. 23 Mago vekamo'a eno, Ala kava nene, Goti'a magoke magoke vaya'ai apakufamo alino katino ne'apatefiye, huno afi ge'nigeno'ae'mo, 24 aise kipapi'mo haitapa falesayafe'mo lapaya mukiki hiyo. Nagaemo lapa pai'nae'mo, asole vaya'mo hai'a falegefe hugaya'monanafa afa'a hai'a ofalegae. 25 No aepa vekamo'a he tino kitamo ki male'nisigetapae'mo kumatega he titapa mai'netapae'mo kitale'mo hakalu hakalu nehutapae'mo, Ala nene, kitamo yakika lato, hutapa nehisageno'ae'mo, olapake'nova vayanagi haiya'alegati ne'ae, huno lapafi gesigetapae'mo, 26 kagae'e'mo magokepi lokaeta mai'neta ne'ya'mo ne'none. Kagaemo kumatile'mo alika laya male'nane, hutapa ha paisageno'ae'mo, 27 olapake'nova vayanagi haiya'alegati ae. Muki vaya'amogitapamo hosu kava'mo nehaya vayanagi nagaetegati'mo ataleta lapaune hetapa viyo, huno lapa paigiye. 28 Lapakaemo alino lapafaitalesigetapa mai'netapae'mo apakesayana Emalehamu'agi Aisiki'agi Yekopu'agi muki vaya'mo Gotitegati gemo alini e'a ae'a hakalo hu'a hapa nepaiya vaya'e'mo Goti'a yagaino ne'apateya kote'mo mai'nisagetapa malaga mai'netapa apaketetapae'mo avi'ya huge lapaipamo le'ninagetapa lapavepi'mo hanitapa agafu kige huta maigae. 29 Muki asole vaya'mo yegemo haine ne'eya kotegati'mo ege yegemo lamino nefaleya kotegati'mo ege aluga aluga haopalegati'mo ege hu'a e'a Goti'a yagaino ne'apateya kote hi'yalamute'mo siate mai'ne'apae'mo ne'ya'mo negae. 30 Afiyo, mago hemenimo henaga ne'maiya vaya'mo hogote vaya'mo maisage'a mago hemenimo hogote'a ne'maiya vaya'mo henaga vaya'mo maigae, huno hapa pai'niye.

Yesu'a Yulusalemu taonifi'mo mai'naya vaya'aife'mo hau huno apate'niya gemae

(Mt 23:37-39)

31 Ani afina'mo mago Falasi vaya'mo Yesutegamo e'a, Heloti'a kahaegefe'mo nehiyanagi kaune ho, hu'a ha pai'nageno'ae'mo, 32 ani vekamo'a aigofe huteno afela kalamo'a humi nami kava'mo nehiya agufa kalagana huno mai'niya vekalegamo utapae'mo, afiyo, hemeni'e ega'e'mo hosu apaune vaya'mo vaya'ai apaipafati'mo ali'na hapa fai'na apatalege kaita hapau'nisiya vaya'mo ali'na hapage'na apatege hute'na olaga'amo ka atupale'mo u'na ava'yi huguve, huno hiye, hutapa ha paiyo. 33 Fiku yanage'a apakaemo Gotitegati gemo alinino eno aeno hakalo huno hapa nepaiya vekamo alu kotegamo amagisageno faligiye. Yulusalemu taonifike'mo faligiye. 34 Yulusalemuvo, Yulusalemuvo, monote'mo ne'yagaiya vaya'mogitapa lapakaemo Gotitegati gemo alini e'a ae'a hakalo hu'a hapa nepaiya vaya'mo hapaege alino apate'nige'a lapakaetegamo ne'vaya vaya'mo yafa kayoteti'mo kamiti apamagige hutapa ne'maiya vayane. Kokolemogimo apana'aumo ali'a hapakufi'mo ne'apataya kava hu'na muki afina'mo mafa'netapimo nagaetega apavaleli'na esuvafe'mo nahau'niya'monanafa lapakaemo olapau'niye. 35 Afiyo, Goti'a ago lapataleno u'niye. Nagaemo lapa pai'nae'mo o'nagetapa maime maime ne'utapae'mo

Ala kava ne'mo agi'alefe'mo ne'eyanagi Goti'a ha maeno,
hutapa nehutapae'mo ani afina'mo nagegae, huno hapa pai'niye.